اسامہ بن لادن کی "پلے لسٹ " میں کیا تھا ؟ ...ابوبکر قدوسی

اسامہ بن لادن کی "پلے لسٹ " میں کیا تھا ؟
...ابوبکر قدوسی
.
میں نے رات لکھا تھا کہ اسامہ بن لادن کی حکمت عملی پر ہزار اختلاف ہو سکتے ہیں اور ہیں بھی ، لیکن ان کے نظریاتی فرد ہونے پر کوئی شبہ نہیں کیا جا سکتا - یعنی آپ ان کے نظریے سے اختلاف کر سکتے ہیں لیکن یہ نہیں کہہ سکتے کہ وہ بنا کسی سبب اور بغیر کسی مقصد و نظریے کے وطن کو تیاگ کر پہاڑوں میں نکل آئے تھے -
اگلے روز امریکی خفیہ ایجنسی " سی آئی اے " نے اسامہ کے سامان سے ملنے والی اشیاء کی فہرست جاری کی - جن میں کچھ ایسی اشیاء کا ذکر تھا جن پر ہر صاحب بصیرت کو اچھنبا سا ہوا - سچ بات کہوں ؟
مجھے ایک لمحے کے لیے بھی حیرت نہ ہوئی - سبب اس کا یہ تھا کہ جو لوگ کیمیائی ہتھیاروں کا جھوٹ بول کر ایک آباد اور پرسکون ملک عراق کو برباد کر سکتے ہیں ، ان کی اخلاقیات کا کیا عالم ہو گا ؟
وہ کتنے سچے ہو سکتے ہیں ؟
جن نے جھوٹ کی عمارت کھڑی کی اور پھر عراق پر دھاوا بول دیا اور یہی نہیں بلکہ مسلسل نہتی شہری آبادی پر بمباری کی ، حتی کہ لاکھوں افراد کو بے سبب قتل کیا ، دس لکھ معصوم بچوں کا خون ان کی اس تھذیب کے سر پر ہے ، ان کی بات اتنی بھی اہم نہیں کہ ردی کی ٹوکری میں پھینک دی جائے - دیکھئے ردی کی ٹوکری بھی کچھ مقام تو رکھتی ہی ہو گی -
دل چسپ قصہ آگے سے شروع ہوتا ہے کہ اسامہ کے کمپیوٹر کی پلے لسٹ اپنی ویب سائٹ پر نشر کرنے کے کچھ وقت بعد ہی ہٹا لی گئی -
اس کے دو واضح اسباب ہیں - پہلا یہ کہ خود بھی معلوم تھا کہ محض جھوٹ بلکہ ہلکے درجے کا جھوٹ ہے ، لیکن دوسرا مقصد یہ تھا کہ دنیا بھر میں پھیلے اپنی باضابطہ اور بے ضابطہ " سہولت کاروں " کو مواد کی فراہمی - اور جب کچھ وقت گذر گیا تو اس کو ہٹا لیا گیا - اب سہولت کار یہ " مال غنیمت" لیے کھل کھیلیں گے ، گاہے مضحکہ اور گاہے طنز -
سوال اخلاقیات کا بہت پیچھے رہ گیا ، ورنہ ہم کہتے کہ جب مدعی اپنے موقف سے پیچھے ہٹ گیا ، سامان کی فہرست ہی ویب سائٹ سے ہٹا لی ، تو کون سے اخلاقیات اس پر کالم لکھنے اور خبریں دینے کی اجازت دیتے ہیں ؟
بی بی سی کی ویب سائٹ کے الفاظ پڑھیے :
....
"سی آئی اے نے یہ دستاویزات جاری کرنے کے کچھ گھنٹوں بعد ہی اسے اپنی ویب سائٹ سے ہٹا دیں لیکن پوری طرح یہ واضح نہیں کیا کہ اس کی وجہ کیا ہے۔
ویب سائٹ کھولنے پر صرف ایک پیغام آتا ہے جس میں صفحہ نہ کھلنے پر معذرت کی گئی اور کہا گیا کہ تکنیکی وجوہات کی بنا پر مواد ابھی نہیں پڑھا جا سکتا ہے۔
بی بی سی نے مواد جاری ہونے کے بعد فوراً بعد اسے ڈاؤن لوڈ کر لیا تھا جس کے مدد سے اسامہ بن لادن کی زندگی کی کافی دلچسپ تصویرکشی کی جا سکتی ہے۔"
.....
جی جناب ! پڑھا آپ نے - یہی حال بلکہ اس سے سوا ہمارے یہاں کے دیسی لبرلز کا ہے - اب کچھ دن کو ان کے پاس بھی یہ موضوع گرم رہے گا - مجھے بی بی سی کے کالم میں عریاں فلموں کا ذکر نظر نہیں آیا ، لیکن ہمارے ہاں کے اردو اخبارات نے اس کا اضافہ بھی کیا تھا - اصل سورس تو اب ہٹ گیا ، لیکن میں کیسے گمان کر سکتا ہوں کہ بی بی سی والے ایسے ہمدرد ہیں کہ اخلاقا یہ ذکر نہ کیا ہو - ہم نے بارہا مشاہدہ کیا ہے کہ اس ویب سائٹ کے دیسی لبرل اپنے حاکموں کی چاکری میں کچھ بڑھ کے ہی جاتے ہیں - سو یہ اضافہ بھی ہمارے ہاں کے موجدین کا لگتا ہے کہ جن کی خود اپنی صبح و شام اسی ماحول میں گزرتی ہے -
دل چسپ امر یہ ہے کہ اس مواد میں پنجابی گانے بھی شامل کیے گئے ہیں ، نصرت فتح کی قوالیاں ، بالی وڈ کے گانے ، کارٹون فلمز ، پشتو گانے تو اقسام کے ساتھ ذکر ہیں - اس کہانی کار کو کسی نے سمجھایا نہیں کہ بھائی ذرا مسالہ کم رکھو اور آنچ بھی دھیری رکھو ، ہنڈیا ہی جل نہ جائے - خود سے معلوم نہ تھا کہ تاو کتنا رکھنا ہے تو " ہم سب " سے ہی پوچھ لیتے ، بیٹھے کس لیے ہیں ، چاکری ہی تو مقصود ہے -
اسامہ بن لادن ایک شہزادے تھے ، شہزادے اس معانی میں کہ کئی شاہی خاندان ان کے خاندان کی جیب میں آ جائیں - وہ ان عیاشیوں کو ترک کر کے ، پہاڑوں میں آ نکلے ، ان کے لیے بہت آسان تھا کہ واپس پلٹ جاتے ، اس راہ میں نہ آتے - میں پھر کہوں گا کہ ان کے نظریے سے اختلاف کیا جا سکتا ، شوق سے کیجئے ، دھاندلی تو مگر نہ کیجئے -
اچھا میں آپ کو یہ بھی بتا دوں کہ اس خبر کو اہل دانش تو کیا عام لوگوں نے بھی محض ایک جھوٹ کے طور پر لیا ہے - وجہ اس کی یہ ہے کہ ہمارے ہاں بے عمل سے بے عمل مسلمان بھی ایک نمازی اور دین دار بندے کا احترام کرتا ہے ، خود کو اس کے مقابل کمتر سمجھتا ہے ، اس کے احترام میں اور اپنے گناہوں کے خیال میں اس کا سر ہمیشہ جھک جاتا ہے اور سب سے بڑی بات کہوں ؟
اہل مغرب جس طرح "حیاء " اور "طہارت " کا ترجمہ نہیں کر سکتے کہ ان کے دماغ بھی اس مفھوم کو سمجھانے سے قاصر ہیں چہ جائیکہ کہ ترجمانی - ٹھیک اسی طرح "مرد مومن " کی تعریف اور تفہیم تک نہیں پہنچ سکتے -
اسامہ کے کسی عمل سے اختلاف تو ہم کو بھی ہو سکتا ہے لیکن اس میں کوئی شک ہی نہیں کہ وہ مرد مومن تھے - اور حقیقی مومن ان خرافات سے اتنا ہی دور ہوتا ہے جتنا ..اہل مغرب حیاء اور طہارت سے دور ہیں -